या वेळची स्मरणिका

अमेरिकन संस्कृतीमधल्या प्रथा सण उत्सव, इथली जीवनशैली आत्मसात करत असताना मराठी माणसाने या जीवनपद्धतीला कधी मराठी साज चढवला तर कधी मराठी सणांची अमेरिकन आवृत्ती उदयास आणली. कधी मराठी पदार्थांना अमेरिकन रूप दिले, तर कधी अमेरिकन पदार्थांनी सणासुदीच्या पानात जागा मिळवली.

हॅलोवीनला मराठी माणूस भोपळ्याचे जॅक-ओ-लॅन्टर्न बनवतो, आपल्या लहानग्यांना घेऊन ट्रिक आणि ट्रीटची मजा अनुभवतो, थँक्सगिव्हिंगला अमेरिकन पारंपरिक पदार्थांना मराठी ढंगात सादर करतो, मुलाच्या आनंदाकरता ख्रिसमस ट्री उभारतो. गणपती, दिवाळी इथल्या ऑफिसेसमध्ये देशोदेशींच्या लोकांबरोबर मोठ्या प्रमाणावर थाटामाटात साजरे करतो, उकडीचे मोदक, पुरणपोळी, वडापाव आपल्या अ-भारतीय मित्र मैत्रिणीना खाऊ घालतो. आपले क्रिकेट सारखे खेळ, आपले खाद्यपदार्थ अमेरिकेत आता ठायी ठायी स्वतःचे अस्तित्व दाखवू लागले आहेत.

अनेकांनी मराठीचे नाव जागतिक स्तरावर नेऊन ठेवलेआहे. जगभर वापरल्या जाणाऱ्या अद्ययावत टेक्नोलॉजीच्या विश्वात अमेरिकन लोकांच्या खांद्याला खांदा लावून मराठी माणसाने उल्लेखनीय काम केले आहे. स्वतःच्या सामाजिक जबाबदारीचे भान ठेवून इथल्या सामाजिक आणि सांस्कृतिक वर्तुळात देखील मराठी माणसाने स्वतःचे योगदान दिले आहे.

तर…अश्या या अमेरिकन मराठी माणसाच्या वाटचालीचे हलके फुलके दर्शन घडवणारी स्मरणिका आम्ही तयार करत आहोत. ही स्मरणिका सजवायला तुम्ही सर्वानी जरूर भाग घ्यायला हवा. अमेरिकेतल्या मराठी माणसाचे प्रतिबिंब जगभर उमटणार आहे. कारण आम्ही ही स्मरणिका इबुक आणि ऑडीयो बुकच्या रुपात देखील उपलब्ध करून देणार आहोत.

आणि हो…! ही स्मरणिका तुम्ही न विसरता एक अविस्मरणीय ठेवा म्हणून घरी घेऊन जावी या करता स्मरणिका टीमने ३-४ खास गोष्टी केल्या आहेत. अहं ….त्या आत्ता नाही सांगणार. तुम्हाला त्या आवडतील हे मात्र निश्चित.